"Unakumbuka ule msisimko wa kukaa mbele ya runinga usiku wa manane, ukisubiri kwa hamu video ya wimbo uupendao ipite? Enzi ambazo hatukuwa na uwezo wa 'kuskipp' wala kuchagua nini cha kusikiliza, bali tuliruhusu MTVituongoze? Hiyo enzi ya dhahabu, ambayo ilituunganisha na dunia kupitia picha na sauti, imeanza kufifia. Taarifa za kufungwa kwa chaneli za MTV zimepokelewa kwa kimya kikuu, lakini kwa tuliokulia kizazi hicho, huu ni msiba mzito wa kiutamaduni."
Kulikuwa na wakati ambapo kuwasha runinga usiku kulimaanisha kitu kimoja tu: MTV. Haikuwa lazima ujue jina la msanii wala wimbo, ulikaa tu, ukapandwa na mziki kutoka kona zote za dunia. Leo hii, habari za kufungwa kwa baadhi ya MTV channels zimefika kimya kimya, bila kelele, lakini athari yake kwa waliokulia enzi hiyo ni nzito kuliko inavyoonekana.
MTV ilikuwa zaidi ya kituo cha burudani. Ilikuwa kama dirisha la dunia. Kupitia MTV, vijana wa sehemu mbalimbali walijifunza mitindo ya kuvaa, lugha ya muziki, na hata mtazamo wa maisha. Ilikuwa kawaida kuona video za wasanii kabla hawajawa wakubwa, na baadaye kuwaona wakitawala dunia. Hapo ndipo kizazi kizima kilijifunza kuwa muziki haukuwa sauti tu, bali ni utambulisho.
Lakini dunia haikusimama. Kadri miaka ilivyopita, namna tunavyotumia muziki ilibadilika. Watu hawakusubiri tena vipindi vya runinga ili wasikie wimbo mpya. Simu zilichukua nafasi ya runinga, na mitandao kama YouTube, TikTok na Spotify ikawa MTV mpya ya kizazi cha sasa. Muziki ukawa wa kubofya, si wa kusubiri.
MTV yenyewe ilijaribu kuendana na mabadiliko haya, lakini kwa njia iliyowaacha mashabiki wake wengi nyuma. Badala ya muziki, reality shows zikatawala. Video za muziki zikapotea taratibu, na kituo kikaanza kufanana na vingine vingi vya burudani. Hatimaye, watazamaji wakapungua, gharama zikabaki juu, na uamuzi wa kufunga au kupunguza baadhi ya channels ukawa hauepukiki.
Kufungwa kwa MTV channels hakumaanishi kwamba jina la MTV limekufa. Hapana. Lakini ni wazi kwamba MTV kama tuliyoijua — ile ya video za muziki mfululizo na sauti ya vijana — imefikia mwisho wake. Kilichobaki ni brand inayojaribu kuishi kwenye ulimwengu wa kidigitali, mbali na roho yake ya awali.
Kwa waliokulia enzi ya MTV, hii si habari ya media tu. Ni kama kuaga rafiki wa zamani. Ni kukumbuka usiku wa kukaa mbele ya runinga, ndoto za kuwa msanii, na hisia ya kuwa sehemu ya dunia kubwa kuliko ulipo. MTV channels zimefungwa, lakini athari yake kwenye muziki na utamaduni wa vijana haitaweza kufutwa kirahisi.
Enzi imebadilika. Muziki umehamia mifukoni mwetu. Lakini kumbukumbu za MTV zitaendelea kuishi — si kwenye runinga tena, bali kwenye mioyo ya kizazi kilichoikulia.
Tags:
Life
