SEHEMU YA 14
Ilipoishia....
Kule chini ya bahari, Manu na MCA Adrian Sirya walifanikiwa kuwashinda walinzi na kuingia ndani ya chombo kidogo cha majini (Submersible). Huku Khumalo Thembi akikaribia kuvunja mlango kuwafikia, Manu aliwasha injini ya chombo hicho tayari kwa safari ya kutoroka. Wakati huo huo katika mitaa ya Moscow iliyofunikwa na theluji, Abdul alimvamia Angel kwa gari na kuanzisha mapambano makali ya ana kwa ana. Hata hivyo, mapambano yao yalikatizwa na kuwasili kwa kikosi maalum cha Mafaa Henessa kilichowazunguka na kuwataka wasalimishe ile "Kalamu" ya siri. Badala ya kujisalimisha, Angel alifyatua bomu la moshi, na kulipuka kwa moshi mzito mweupe kulibadilisha uchochoro huo kuwa uwanja wa vita na kiza.
Endelea...
Moshi mzito mweupe ulipotanda kwenye uchochoro ule wa Moscow, uliambatana na milio ya risasi zilizokuwa zikirindima mfululizo kutoka kwenye silaha za makomandoo wa Henessa. Walikuwa wakifyatua ovyo, wakitumaini risasi moja itamnasa yule "Ninja".
Lakini kwa Angel, moshi ule haukuwa kikwazo; ulikuwa ni uwanja wake wa nyumbani. Akiwa Clone aliyepandikizwa uwezo wa hali ya juu wa kimwili na kiakili, Angel alitumia miwani yake maalum ya kuona kwenye giza (Thermal lenses) iliyofichwa ndani ya macho yake.
Aliteleza kama mzimu katikati ya ule moshi. Shhhh! Sauti ya kisu ikikata hewa ilisikika, ikifuatiwa na mkwaju mzito. Komandoo wa kwanza alianguka chini akiwa amepoteza fahamu baada ya kupigwa konde zito la shingo. Kabla wengine hawajajua kinachoendelea, Angel aliwashambulia wawili wengine kwa mfuatano wa mateke ya sarakasi yaliyowavunja mbavu na kuwapokonya silaha zao.
Abdul, akiwa amelala kwenye theluji, hakutumia macho yake kuona kwenye moshi, bali alitumia masikio. Alisikia hatua za makomandoo wakianguka. Alitambaa kwa haraka hadi kwa komandoo mmoja aliyekuwa ameangushwa na Angel, akampokonya bunduki yake aina ya M4 Carbine.
Upepo mkali wa Moscow ulianza kupeperusha ule moshi. Angel alikuwa tayari ameshafika kwenye ukuta mrefu wa uchochoro huo. Aliruka kwa wepesi wa paka, akashika ukingo wa ukuta, tayari kujivuta juu na kutoweka na ile kalamu ya siri.
Paa! Paa! Paa!
Abdul alifyatua risasi tatu mfululizo akimlenga Angel. Risasi moja ilipita sentimita chache kutoka kwenye shavu la Angel na kuchubua ngozi yake kidogo, huku nyingine ikipiga kwenye ukuta. Angel alisimama kwa sekunde moja, akageuka na kumtazama Abdul chini kwa jicho la kifo, kisha akajivuta juu na kutoweka kabisa nyuma ya jengo lile.
Kiongozi wa kikosi cha Henessa aliyejeruhiwa mkono, alisimama kwa taabu na kumnyooshea Abdul silaha. "Wewe ni nani? Uko na yule Ninja?"
Abdul alitupa ile bunduki chini, akainua mikono yake taratibu, huku akitabasamu kwa damu. "Mimi ni adui wa adui yenu. Kama mnamtaka huyo msichana na mzigo alioubeba, mtajutia kuniua. Nahitaji kuongea na bosi wenu... Mafaa Henessa."
Makomandoo walitazamana, kisha mmoja akamfunga Abdul pingu za plastiki. Mchezo wa Moscow ulikuwa umechukua mkondo mwingine; Abdul alikuwa ameamua kuingia mkataba na shetani ili kumpata Angel.
Kituo cha Chini ya Bahari – (Mahali Pasipojulikana)
Bwaaam!
Mlango mzito wa chuma wa bohari ulikunjwa na kulipuliwa kwa baruti kali. Khumalo Thembi na walinzi wake waliingia ndani huku wakimimina risasi kuelekea kwenye lile dimbwi ambapo chombo cha majini (Submersible) kilikuwa kimeegeshwa.
Lakini walichelewa. Chombo hicho cha kijivu kilikuwa tayari kimeshazama kwenye maji, kikiacha tu mapovu makubwa yakipanda juu.
"Wametoa chombo! Washa mitambo ya ulinzi ya majini (Torpedoes)! Nataka wasambaratishwe vipande vipande chini ya bahari!" Khumalo alinguruma kwenye redio yake ya mawasiliano.
Ndani ya Submersible, hali ilikuwa ya taharuki. Taa za ndani zilikuwa na rangi ya bluu hafifu. Manu alikuwa ameshikilia usukani wa chombo hicho huku akitazama rada iliyokuwa mbele yake. Adrian alikuwa amejifunga mkanda vizuri, akihema kwa kasi, macho yake yakiwa yamefumbwa kwa hofu.
"Manu, tuko salama? Tuko nje?" Adrian aliuliza kwa sauti ya kutetemeka.
"Tuko kwenye maji ya wazi, lakini hatuko salama," Manu alijibu, macho yake yakiwa yamekazwa kwenye skrini. "Mfumo wa ulinzi wa kituo hiki hautatuacha tuondoke kirahisi. Nashika usukani, lakini nahitaji utulivu."
Ghafla, king'ora cha onyo (Warning Alarm) kilianza kulia kwa sauti kali ndani ya chombo chao. Skrini ya rada ilionyesha alama mbili nyekundu zilizokuwa zikija kwa kasi ya ajabu kutoka nyuma yao zikiwafuata.
"Torpedoes mbili zimetufunga shabaha (locked on)," Manu alisema, jasho likianza kumtoka. "Zinafuata joto la injini yetu."
"Fanya kitu, Manu! Hatukuokoka kule ndani ili tufe hapa kwenye maji ya chumvi!" Adrian alipiga kelele.
Manu alivuta usukani kwa nguvu, akikata kona kali ya digrii tisini chini ya maji. Chombo kililala upande, Adrian akahisi utumbo wake ukigeuka. Lakini zile torpedoes nazo zilikata kona, zikiendelea kuwafuta.
"Haziwezi kukwepwa kwa uendeshaji tu," Manu aliwaza kwa sauti. Aligeukia paneli ya kompyuta iliyokuwa pembeni yake. "Nahitaji kuzima injini."
"Kuzima injini? Tutazamaje juu? Tutazimaje katikati ya bahari?"
"Amini ninachofanya!" Manu alifoka. Alibonyeza kitufe kikubwa chekundu. Ghafla, chombo chao kilipoteza nguvu zote. Taa zilizimika, sauti ya mngurumo ikakata, na chombo kikaanza kuelea kimya kimya kwenye giza nene la kina cha bahari.
Zile torpedoes zilipokaribia, zilikosa joto la injini ya chombo cha Manu. Badala yake, ziliendelea kwenda mbele kwa kasi, zikipishana na chombo chao kwa umbali wa mita chache tu, na kwenda kulipuka kwenye mwamba mkubwa wa matumbawe uliokuwa mbele yao. Mlipuko huo ulisababisha mawimbi mazito chini ya maji yaliyokitikisa chombo chao kama ganda la njugu.
Maji yalipotulia, Manu aliwasha tena mifumo ya dharura. "Tuko salama kwa sasa. Lakini betri yetu itatufikisha tu kwenye fukwe za karibu."
"Na fukwe za karibu ni wapi?" Adrian aliuliza akishusha pumzi nzito.
Manu alitazama GPS. "Tuko pwani ya Kenya. Karibu na kambi ya jeshi ya Lamu. Na hapo ndipo mambo yanapokuwa magumu... maana hiyo ni kambi ya Rais Willy Baro, na huko ndiko walikomshikilia Nuru."
Nairobi, Kenya.
Naibu Rais Rihadh Gahag alikuwa amekaa kwenye kiti chake cha ngozi, akivuta sigara kubwa aina ya Cigar. Uso wake wenye asili ya Kihindi ulikuwa umefichwa kiasi na moshi aliokuwa akiupuliza hewani.
Mlango ulifunguliwa na msaidizi wake mkuu akaingia kwa haraka, akiwa ameshikilia tablet.
"Mheshimiwa Naibu Rais... tuna tatizo. Kituo chetu kikuu cha chini ya maji kimeripoti kutoroka kwa wafungwa. Emmanuel Charo na Adrian Sirya wameiba Submersible na kutoweka."
Gahag aliacha kuvuta sigara, macho yake yakipungua kwa ukali. "Khumalo ni mpumbavu! Manu akiwa hai huko nje, mradi mzima wa Vivuli uko hatarini. Anajua mengi."
"Tufanye nini Mheshimiwa? Tunadhani wataelekea upande wa kambi ya Lamu."
Gahag alitabasamu kwa uovu. Alichukua simu ya siri na kupiga namba moja. "Nuru yuko pale Lamu, sivyo? Mpeni simu aongee na Manu, kisha mtumieni Nuru kama chambo. Manu hawezi kumuacha msichana aliyemuokoa afe. Akija kumtafuta Nuru... mkamateni na mumuue hapohapo."
Mtego mpya ulikuwa umewekwa. Manu alikuwa ameponyoka kifo kimoja, lakini alikuwa akiogelea moja kwa moja kwenye kinywa cha mamba.
Itaendelea